Page 6

ደሴን ከባቢኣን ንምቁፅፃር ምክንያት ዝኮኑ ኣኽራናት ንጀጋኑ ዝናፍቁ ክመስሉ፣ ደበና ሓጋይ ሓዚሎም ተፀበዩ ኣነ ምስ ብፆተይ ደድሕሪ ፀላእትና ሰዓብና፡፡ ጥይት እናወዳአኩ ስለዝነበረ ረዳተይ ድማ ንዝተረፈ ጥይት ሒዙለይ ደድሕረይ ሰዓበ፡፡ ኣጋግዘ ናብ ምግዳል ዝወፃዕኩላ ዕለት ዘከርኩዋ፡፡ ኣጋምሸት ነበረ፡፡ ንክልቲአን ወቕቲታት ኣመሳሰልኩወን፡፡ ክምትምት በለኒ፡፡ ንምንታይ ግን ኣይተረድኣኒን፡፡ ርግእ ኢሉ ዝመሰል ዝነበረ ውግእ ኣብ Uባታት ገራዶ ምስበፅሐ ደመቐ፡፡ ኣበኡ'ውን ፀላኢ ኣየትከለን፡፡ ሃዲሙ ተዓዘረ፡፡

ይኹን'ምበር ንቕድሚት ኣብ ምጉያይ ናህሪ ክውስክ ገበረኒ፡፡ "ኣረ ደሴ ደሴ ገራዶ ገራዶ" ዝብል ዜማ ጥራሕ እናሰምዐ ብርሑቕ ንገራዶ ዝናፍቕ ዝነበርኩ ብኣካል ምስረኣኩዋ ተገረምኩ፡፡

ናይ የማናይቲ እግረይ ኣብ ዝጨከነት ምድሪ ረገፀት፡፡ ቀስ ኢላ ዘይኮነትስ ብናይ ጉያ ናህሪ ብዝረገፅክዋ ፀረ-ሰብ ፈንጂ ፀላኢ ንሙሉእ ክብደተይ ተሸኪማ ንሰማይ ተፀረገት፡፡ መሬት ሓቢኣቶ ዝነበረት ምስጢር ተጋሂዱ፡፡ ድምፂ ፈንጂ ተደባለቐ፡፡ ልዕሊ 5 ሜትሮ ናብ ሰማይ ምስ ዓረግኩ ከም እንደገና ብስሕበት መሬት ናብታ ብፈንጂ ዝተኹዓተት ጉድጓድ እንትዓልብ ተፈለጠኒ፡